Элдик Банк PCAF эл аралык демилгесине кошулду
«Элдик Банк» ААК көмүртек эмиссиясын финансылык эсепке алуу боюнча эл аралык Partnership for Carbon Accounting Financials (PCAF) демилгесине кошулуп, аталган глобалдык өнөктөштүктүн мүчөсү болгон Кыргыз Республикасындагы алгачкы финансылык уюм болду.
PCAF - бул банктарды, инвесторлорду жана камсыздандыруу компанияларын бириктирген, алардын финансылык ишмердүүлүгүнө байланыштуу парник газдарынын (ПГ) эмиссиясын баалоо жана ачыктоо боюнча глобалдык демилге.
PCAF методологиясы финансылык ишмердүүлүккө байланыштуу эмиссияларды өлчөөнүн эл аралык деңгээлде таанылган стандарты болуп саналат жана финансылык уюмдардын климаттык отчеттуулугунун ачыктыгын жана жоопкерчилигин жогорулатууга көмөктөшөт.
PCAF демилгесине кошулуу «Элдик Банк» ААКнын туруктуу өнүгүү стратегиясын ишке ашыруудагы маанилүү кадам болуп саналат жана Банктын туруктуу каржылоо, жоопкерчиликтүү банк иши жана ESG принциптерине берилгендигин тастыктайт.
Бул демилгеге катышуу Банкка төмөнкү мүмкүнчүлүктөрдү берет:
- кредиттик жана инвестициялык портфелдердин климатка тийгизген таасирин өлчөө жана баалоо системасын өркүндөтүү;
- туруктуу каржылоо жаатындагы мыкты эл аралык тажрыйбаларды киргизүү;
- климаттык маалыматтарды ачыктоо боюнча ачыктыкты жогорулатуу;
- эл аралык финансылык уюмдар жана өнөктөштөр менен кызматташууну чыңдоо.
«Элдик Банк» ААК Кыргыз Республикасынын алдыңкы финансылык уюмдарынын бири болуп саналат жана өлкөнүн экономикасын жана финансылык секторун өнүктүрүүдө маанилүү ролду ойнойт. Банк туруктуу өнүгүүнүн заманбап ыкмаларын ырааттуу түрдө ишке ашырып, экологиялык жана социалдык туруктуулукту колдогон долбоорлорду каржылоого көмөктөшүп, ошондой эле ESG башкаруу практикасын активдүү өнүктүрүп келет.
