Eldik тиркемесинде такси айдоочулук күбөлүгүн тариздеңиз
«Элдик Банк» ААК Кыргыз Республикасынын Ички иштер министрлигинин Жол кыймылынын коопсуздугун камсыздоо боюнча башкы башкармалыгы (ЖКККББ) менен биргеликте таксомотордук ишмердүүлүктү жүргүзүүгө лицензияны алыстан тариздөө боюнча санариптик кызматты ишке киргизет.
Жаңы сервис кардарларга мамлекеттик органдарга жеке кайрылбастан лицензия алуу үчүн арыз берүүгө мүмкүнчүлүк түзөт. Бул үчүн Eldik мобилдик тиркемесин колдонуу жетиштүү: арызды толтуруп, мамлекеттик алымды төлөө керек. Арыздын статусу тууралуу маалымат колдонуучуга аны кароонун бардык этаптарында жеткиликтүү болот.
Лицензия жактырылгандан кийин аны алуу ыкмасын тандоо мүмкүнчүлүгү каралган: ЖКККББнын аймактык бөлүмүнөн кагаз түрүндө же «Түндүк» мобилдик тиркемеси аркылуу PDF форматындагы электрондук документ катары алуу.
Бул чечимди ишке киргизүү «Элдик Банк» ААКнын финансылык жана мамлекеттик кызматтарды интеграциялаган бирдиктүү санариптик экосистеманы өнүктүрүүгө, ошондой эле калкка көрсөтүлүүчү кызматтардын жеткиликтүүлүгүн жана сапатын жогорулатууга багытталган стратегиясынын алкагында жүзөгө ашырылууда.
