Элдик Банк ЭЭУнун жумуш ордунда дискриминацияга жол бербөө боюнча окутуусуна катышты

Элдик Банк Эл аралык эмгек уюмунун (ЭЭУ) жумуш ордунда дискриминацияга жол бербөөгө арналган конвенциялар боюнча тренингине катышты. Иш-чара «Аялдар жана кыздарга карата зомбулукка каршы 16 күндүн активизми» аттуу глобалдык кампаниянын алкагында өттү.

Банк атынан гендер жана инклюзия боюнча менеджер Жылдыз Абдылдаева Гендердик теңчилик саясаты боюнча презентацияны сунуштады. Ал банктын тең мүмкүнчүлүктөрдү илгерилетүү жана коопсуз эмгек чөйрөсүн түзүү боюнча негизги ыкмаларын тааныштырды.

Тренингдин жүрүшүндө катышуучулар ЭЭУнун Эмгекте дискриминация боюнча Конвенциясын (№111) жана Зомбулук менен куугунтуктоого каршы Конвенциясын (№190) талкуулап, иш берүүчүлөрдүн ролуна жана жумуш ордунда дискриминация менен зомбулуктун алдын алуунун натыйжалуу тажрыйбаларына көңүл бурушту. Ошондой эле Конвенция №190ды ратификациялоо жана ишке ашыруу боюнча эл аралык тажрыйба жана бир катар өлкөлөрдүн мыкты практикалары сунушталды.

Суроо-жооп сессиясы катышуучуларга практикалык тажрыйбаларды, бар болгон чакырыктарды жана эмгек коопсуздугу менен теңчиликти камсыз кылуу стандарттарын киргизүү жолдорун талкуулоого мүмкүнчүлүк берди. Талкуулардын жыйынтыгында уюмдарда Гендердик теңчилик саясатын мындан ары ишке ашыруу боюнча бир катар сунуштар иштелип чыкты.