Элдик Банк «Бизнес, экология жана спорт – Ак-илбирс 2025» форумунун катышуучусу болду
23-октябрда Бишкек шаарында Кыргыз Республикасы демилге көтөрүп, БУУнун Башкы Ассамблеясынын резолюциясы менен бекитилген Кар барсынын эл аралык күнүнө арналган «Бизнес, экология жана спорт – Ак-илбирс 2025» форуму болуп өттү.
Иш-чарага мамлекеттик түзүмдөрдүн, эл аралык уюмдардын, каржы институттарынын, спорт жана бизнес чөйрөсүнүн өкүлдөрү катышты.
Форум биотүрдүүлүктү сактоо, каржы секторунун жана жашыл инвестициялардын ролу, ошондой эле экологиялык жоопкерчиликтүү спорт менен туризмди өнүктүрүү маселелерин талкуулоого арналган уникалдуу аянтча болду.
Элдик Банк Кыргызстандагы табият мурасын сактоого багытталган жашыл каржылык инструменттерди жана корпоративдик жоопкерчилик тажрыйбаларын киргизүү боюнча өз тажрыйбасын сунуштады.
Банк туруктуу экономиканы курууда каржы секторунун катышуусу маанилүү экенин, анда табигый ресурстар «табиат капиталы» катары каралып, инвестиция жана этият мамилени талап кыларын белгиледи.
«Ак-илбирс 2025» форумуна катышуу Элдик Банктын экологиялык миссиясынын мыйзам ченемдүү уландысы болду. Өз демилгелеринин алкагында банк табиятты коргоо долбоорлорун, жашыл кредиттерди өнүктүрүүнү, коруктарга фото жана видео тузактар орнотууну, ошондой эле Кыргызстан тоолорунун тазалыгы менен туруктуулугунун символу болгон кар барсты сактоо үчүн билим берүү жана ыктыярчылык акцияларын колдоп келет.
