Элдик Банкка S&P Global Ratings тарабынан "В+" кредиттик рейтинги ыйгарылды

S&P Global Ratings эл аралык рейтинг агенттиги "Элдик Банк" ААКна "Туруктуу" прогнозу менен "В+" узак мөөнөттүү кредиттик рейтингин ыйгарды. Мындай жыйынтык Элдик Банктын туруктуу финансылык абалын, ошондой эле, мамлекет тарабынан ырааттуу колдоого ээ экенин көрсөтүп турат. Кыргызстандын тиешелүү өз алдынчалык деңгээлине ылайык келген рейтингдин ыйгарылышы Элдик Банктын улуттук экономика үчүн стратегиялык маанисин жана өлкөнүн каржы секторун өнүктүрүүдөгү негизги ролун тастыктайт.

Агенттик өз отчетунда Элдик Банк уставдык капиталын 61,5 миллиард сомго (700 миллионго жакын АКШ доллары) ийгиликтүү кошумча капиталдаштырып, 200 миллиард сомдон ашуун активдери менен Кыргызстандагы эң ири банк экенин, бул анын финансылык базасын олуттуу түрдө чыңдап, ири инфраструктуралык долбоорлорду каржылоо мүмкүнчүлүктөрүн кеңейткенин баса белгилеген.

S&P, ошондой эле, банктын айыл чарбаны өнүктүрүүгө, керектөө кредиттерине жана инфраструктураны каржылоого стратегиялык багытын белгилеп, кардарлар үчүн жаңы шарттарды түзгөн жана заманбап кызматтардын алкагын кеңейтүүчү маанилүү багыт катары «Скай Мобайл» ЖЧКны (Beeline Кыргызстан бренди) санариптик трансформациялоо жана банктын экосистемасына интеграциялоо аракеттерин атап кетти.

S&P Элдик Банктын, мамлекетке тиешелүү компания (GRE) катары, жогорку системалык маанисин өзүнчө баса белгилеп, анын эл аралык карыз алышуулар жана үлүштүк капитал рынокторуна чыгуу пландарын белгиледи.

"В+" рейтингинин Банкка ыйгарылышы, башка аракеттер менен катар эле, 2026-жылдын башында еврооблигацияларды алгачкы ирет жайгаштыруу стратегиясын да колдойт.

«Элдик Банк» ААК Башкармасынын Төрагасы Уланбек Ногаев белгилеп кеткендей: "S&P Global Ratings тарабынан эл аралык рейтингдин биздин Банкка ыйгарылганы Элдик Банктын жана Кыргызстандын бүткүл банк тутумунун тарыхындагы урунттуу жылыш болуп саналат. Бул жыйынтык биздин туруктуулугубуздун, ачык-айкындуулугубуздун жана улуттук экономиканы өнүктүрүүдөгү стратегиялык ролубуздун таанылышы болуп саналат. Банкка ыйгарылган бул рейтинг эл аралык инвесторлордун ишенимин бекемдейт жана ири инфраструктуралык долбоорлорду каржылоого жаңы мүмкүнчүлүктөрдү түзөт».